اسپین میں امریکا اور چین کے درمیان تجارتی مذاکرات کا آغاز

میڈرڈ: امریکا اور چین کے اعلیٰ حکام نے اسپین کے دارالحکومت میڈرڈ میں کشیدہ تجارتی تعلقات پر بات چیت شروع کر دی ہے۔

مذاکرات میں امریکی پابندیاں، روسی تیل کی خریداری، اور ٹک ٹاک کے امریکی آپریشنز کی فروخت کی ڈیڈ لائن اہم موضوعات رہے۔

رائٹرز کے مطابق امریکی وزیر خزانہ اسکاٹ بیسنٹ اور تجارتی نمائندہ جیمیسن گریئر نے چینی نائب وزیراعظم ہی لی فینگ اور سینئر مذاکرات کار لی چنگ گانگ سے ملاقات کی۔ یہ چار ماہ میں یورپ میں دونوں ممالک کے درمیان ہونے والی چوتھی بڑی ملاقات ہے۔

ماہرین کا خیال ہے کہ اس اجلاس میں بڑے فیصلے متوقع نہیں، البتہ ٹک ٹاک کی فروخت کی ڈیڈ لائن میں توسیع کیے جانے کا امکان موجود ہے، بصورت دیگر امریکا میں اس پر پابندی لگ سکتی ہے۔

امریکی صدر ڈونلڈ ٹرمپ پہلے ہی 10 نومبر تک چینی مصنوعات پر موجودہ محصولات برقرار رکھنے کا اعلان کر چکے ہیں۔ ماہرین کے مطابق اہم فیصلے ممکنہ طور پر سال کے آخر میں ٹرمپ اور چینی صدر شی جن پنگ کی ملاقات کے دوران ہوں گے۔

اجلاس میں روسی تیل کی خریداری پر دباؤ بڑھانے، برآمدی کنٹرولز اور امریکی اتحادیوں پر اضافی محصولات سے متعلق امور بھی زیر بحث آئے۔