یو اے ای کو شکست،پاکستان سپر فور میں پہنچ گیا

دبئی: ایشیا کپ ٹی ٹوئنٹی کے اہم میچ میں پاکستان نے متحدہ عرب امارات کو 42 رنز سے شکست دے کر سپر فور مرحلے کے لیے کوالیفائی کر لیا۔

پاکستان کے 147 رنز کے ہدف کے تعاقب میں یو اے ای کی پوری ٹیم 105 رنز بنا کر آؤٹ ہوگئی۔

گروپ اے کے اس میچ میں یو اے ای نے ٹاس جیت کر پاکستان کو پہلے بیٹنگ کی دعوت دی۔ پاکستان نے مقررہ 20 اوورز میں 9 وکٹوں پر 146 رنز اسکور کیے۔

گرین شرٹس کی جانب سے فخر زمان نے شاندار 50 رنز بنائے جبکہ شاہین شاہ آفریدی نے آخری اوورز میں 14 گیندوں پر 29 رنز کی جارحانہ اننگز کھیل کر ٹیم کا اسکور آگے بڑھایا۔

دیگر بیٹسمینوں میں صائم ایوب صفر پر، صاحبزادہ فرحان 5، کپتان سلمان علی آغا 20، حسن نواز 3، خوشدل شاہ اور محمد نواز 4،4 اور محمد حارث 18 رنز بنا سکے۔

یو اے ای کی جانب سے جنید صدیق نے 4 جبکہ سمرن جیت سنگھ نے 3 کھلاڑیوں کو پویلین بھیجا۔ یو اے کی جانب سے راہول چوپڑا نے 35 جبکہ داروپراشار نے 20 رنز بنائے ، پاکستان کی جانب سے شاہین آفریدی ، ابرار احمد نے 2 ، 2 جبکہ حارث رئوف نے تین وکٹیں حاصل کیں۔

پاکستان کی ٹیم میں اس میچ کے لیے دو تبدیلیاں کی گئیں: سفیان مقیم اور فہیم اشرف کی جگہ حارث رؤف اور خوشدل شاہ کو شامل کیا گیا۔