امریکا میں ورک ویزا کے خواہشمندوں کے لیے بڑا دھچکا

واشنگٹن: امریکا میں روزگار کے مواقع تلاش کرنے والوں کے لیے بری خبر سامنے آ گئی۔ امریکی صدر ڈونلڈ ٹرمپ نے ایچ ون بی (H-1B) ورک ویزا کی فیس میں تاریخی اضافہ کرتے ہوئے اسے ایک لاکھ ڈالر مقرر کر دیا ہے۔

غیر ملکی میڈیا کے مطابق صدر ٹرمپ نے اس نئے حکم نامے پر دستخط کر دیے ہیں، جس کے بعد کمپنیوں اور امیدواروں کو ویزا حاصل کرنے کے لیے خطیر رقم ادا کرنا ہوگی۔ ٹرمپ کا کہنا ہے کہ بعض صورتوں میں کمپنیوں کو اس سے بھی زیادہ مالی بوجھ برداشت کرنا پڑ سکتا ہے۔

ماہرین کے مطابق اس فیصلے کا سب سے زیادہ اثر ٹیکنالوجی کمپنیوں پر پڑے گا جو بھارت اور چین سمیت مختلف ممالک سے ماہرین کو ملازمت دیتی ہیں۔ ویزا فیس میں اس بے تحاشا اضافے کے بعد عالمی سطح پر بھرتیوں کے عمل کو بھی مشکلات کا سامنا کرنا پڑے گا۔

اس سے قبل ایچ ون بی ویزا کے لیے درخواست فیس محض 215 ڈالر سے شروع ہوتی تھی اور مخصوص مراحل میں چند ہزار ڈالر تک پہنچتی تھی، لیکن اب ایک لاکھ ڈالر کی مقررہ فیس نے کمپنیوں اور ملازمت کے خواہشمند دونوں کو مشکل میں ڈال دیا ہے۔

امیگریشن ماہرین کا کہنا ہے کہ یہ فیصلہ نہ صرف ہنر مند افراد کے لیے امریکا آنے کے خواب کو دھچکا دے گا بلکہ امریکی ٹیکنالوجی انڈسٹری کے لیے بھی نقصان دہ ثابت ہوسکتا ہے۔