ایشیا کپ فائنل سے قبل پاک بھارت کپتانوں کا ٹرافی فوٹو شوٹ منسوخ

دبئی میں پاکستان اور بھارت کے درمیان ایشیا کپ کا فائنل کل بروز اتوار شیڈول ہے، تاہم دونوں ٹیموں کے درمیان جاری کشیدگی کے باعث روایتی ٹرافی فوٹو شوٹ خطرے میں پڑ گیا۔

انتظامیہ نے تصدیق کی ہے کہ ہفتے کے روز فوٹو شوٹ نہیں ہوگا، البتہ فائنل کے دن اس حوالے سے حتمی فیصلہ متوقع ہے۔

بھارتی ٹیم نے ایونٹ کے دوران پاکستان کے ساتھ مصافحہ کرنے سے بھی گریز کیا تھا، جس کے باعث امکان ہے کہ ٹرافی کے ساتھ مشترکہ تصاویر بھی نہ لی جائیں۔

ادھر قومی ٹیم کے کپتان سلمان علی آغا آج رات 7 بجے پریس کانفرنس کریں گے، جب کہ کھلاڑی رات 7 سے 10 بجے تک دبئی میں واقع آئی سی سی اکیڈمی میں پریکٹس سیشن میں حصہ لیں گے۔