افغانستان کی سرزمین کسی ملک کے خلاف استعمال نہیں ہونے دی جائے گی

 

کابل: افغان عبوری حکومت نے کہا ہے کہ افغانستان کی سرزمین کسی دوسرے ملک کے خلاف استعمال نہیں ہونے دی جائے گی اور نہ ہی کسی غیر ملکی فوجی اڈے کے قیام کی اجازت دی جائے گی۔

پاکستان، چین، ایران اور روس کے وزرائے خارجہ اجلاس پر ردعمل دیتے ہوئے افغان عبوری حکومت کے ترجمان حمد اللہ فطرت نے کہا کہ غیر ملکی فوجی اڈے کے خلاف موقف کا خیر مقدم کرتے ہیں۔ افغانستان پاکستان، روس، چین اور ایران کے موقف کی مکمل حمایت کرتا ہے۔

انہوں نے واضح کیا کہ افغانستان میں کسی مسلح گروہ کو سرگرمیوں کی اجازت نہیں دی گئی اور یہ بات بے بنیاد ہے کہ افغانستان سے دوسرے ممالک کو کوئی خطرہ لاحق ہے۔

ترجمان کے مطابق افغانستان بدعنوانی، منشیات اور ہر قسم کے منفی اقدامات کے خلاف سخت اقدامات کر رہا ہے۔ کابل تمام ممالک کے ساتھ باہمی احترام اور اعتماد پر مبنی دوستانہ تعلقات چاہتا ہے۔

حمد اللہ فطرت نے کہا کہ علاقائی ممالک کی جانب سے افغانستان کے استحکام کی حمایت ایک مثبت موقع ہے جس کے ذریعے افغانستان اپنے سیاسی و اقتصادی روابط مزید مضبوط بنا سکتا ہے۔ انہوں نے مزید کہا کہ کابل کا ہمسایہ ممالک کے خدشات کا مثبت جواب دینا اعتماد سازی کو فروغ دے گا۔