آئی سی سی ویمن کرکٹ ورلڈ کپ کا آج سےآغاز

آئی سی سی ویمن کرکٹ ورلڈ کپ کا آغاز آج سے ہو رہا ہے، اور افتتاحی میچ بھارت اور سری لنکا کے درمیان گوہاٹی میں کھیلا جائے گا۔

ٹورنامنٹ میں کل آٹھ ٹیمیں حصہ لے رہی ہیں جن میں دفاعی چیمپئن آسٹریلیا، نیوزی لینڈ، جنوبی افریقہ، انگلینڈ، پاکستان، سری لنکا، بنگلہ دیش اور بھارت شامل ہیں۔

پاکستانی ویمن ٹیم اپنے تمام میچز سری لنکا کے دارالحکومت کولمبو میں کھیلے گی۔ ٹیم اپنی مہم کا آغاز 2 اکتوبر کو بنگلہ دیش کے خلاف میچ سے کرے گی۔

کپتان فاطمہ ثنانے کہا کہ کولمبو میں ٹریننگ سیشنز انتہائی مفید رہے اور میں کھلاڑیوں کی توانائی اور کمٹمنٹ سے خوش ہوں۔ انہوں نے امید ظاہر کی کہ ٹیم بہترین کھیل پیش کرے گی۔

پاکستانی ویمن ٹیم میں کپتان فاطمہ ثنا کے علاوہ منیبہ علی، سدرہ امین، عالیہ ریاض، شوال ذوالفقار، صدف شمس، نتالیہ پرویز، ایمان فاطمہ، ڈیانا بیگ، رامین شمیم، سدرہ نواز، عمیمہ سہیل، سیدہ عروب شاہ، نشرہ سندھو اور سعدیہ اقبال شامل ہیں۔