بنگلہ دیش نے افغانستان کو ٹی ٹوئنٹی سیریز میں کلین سویپ کر دیا

شارجہ کرکٹ اسٹیڈیم میں کھیلے گئے تیسرے اور آخری ٹی ٹوئنٹی میچ میں بنگلہ دیش نے افغانستان کو چھ وکٹوں سے شکست دی اور سیریز میں 3-0 سے کلین سویپ مکمل کر لیا۔

افغانستان نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 143 رنز بنائے۔ جواب میں بنگلہ دیش نے ہدف 18 اوورز میں 4 وکٹوں کے نقصان پر حاصل کر لیا۔ سیف حسن کی ناقابلِ شکست 64 رنز کی شاندار اننگز نے ٹیم کو فتح دلوائی۔

بنگلہ دیش کے بولرز شریف الاسلام، محمد سیف الدین، نسیم احمد اور رشید حسین نے بہترین بائولنگ کا مظاہرہ کیا، جس سے افغانستان کی وکٹیں مسلسل گرتی رہیں۔

سیریز کے پہلے میچ میں بنگلہ دیش نے 4 وکٹوں سے، دوسرے میچ میں 2 وکٹوں سے فتح حاصل کی تھی، جس کے بعد تیسرے میچ کی فتح کے ساتھ کلین سویپ مکمل ہوا۔