پاکستان اور جنوبی افریقہ کے درمیان پہلا ٹیسٹ کل کھیلا جائیگا

لاہور: پاکستان اور جنوبی افریقہ کے درمیان دو ٹیسٹ میچوں پر مشتمل سیریز کا پہلا ٹیسٹ کل قذافی اسٹیڈیم لاہور میں شروع ہوگا، قومی ٹیم کی پلیئنگ الیون فائنل کر دی گئی ہے۔

پاکستان کی قیادت شان مسعود کریں گے جبکہ ٹیم 7 بیٹرز، 2 فاسٹ بولرز اور 2 اسپنرز کے ساتھ میدان میں اترے گی۔ وائرل بخار کے باعث ساجد خان کی عدم دستیابی پر 38 سالہ بائیں ہاتھ کے اسپنر آصف آفریدی کو ڈیبیو کا موقع دیا گیا ہے۔ آصف آفریدی نے فرسٹ کلاس کرکٹ میں 57 میچوں میں 198 وکٹیں حاصل کی ہیں۔

تجربہ کار اسپنر نعمان علی بھی اسکواڈ کا حصہ ہیں، جنہوں نے 19 ٹیسٹ میچوں میں 83 وکٹیں حاصل کی ہیں۔ فاسٹ بولنگ میں شاہین شاہ آفریدی ایک سال بعد ٹیم میں واپسی کر رہے ہیں، ان کے ساتھ حسن علی نئی گیند کا آغاز کریں گے۔

پاکستانی اننگز کا آغاز امام الحق اور عبداللہ شفیق کریں گے۔ دیگر کھلاڑیوں میں شان مسعود (کپتان)، بابر اعظم، سعود شکیل، محمد رضوان (وکٹ کیپر)، سلمان علی آغا، شاہین شاہ آفریدی، حسن علی، نعمان علی اور آصف آفریدی شامل ہیں۔

یہ میچ آئی سی سی ورلڈ ٹیسٹ چیمپئن شپ 2025-27 کے چوتھے سائیکل کا حصہ ہے۔