ویمنز ورلڈ کپ: انگلینڈ نے بھارت کو ہرا کر سیمی فائنل کیلیے کوالیفائی کرلیا

اندور:  انٹرنیشنل کرکٹ کونسل (آئی سی سی) ویمنز ورلڈکپ میں انگلینڈ نے بھارت کو ایک سنسنی خیز مقابلے کے بعد 5 رنز سے شکست دے کر سیمی فائنل کے لیے کوالیفائی کر لیا۔

اندور میں کھیلے گئے اس اہم میچ میں انگلش کپتان ہیتھر نائٹ کی شاندار سنچری نے ٹیم کی جیت میں کلیدی کردار ادا کیا۔

انگلینڈ نے پہلے بیٹنگ کرتے ہوئے 8 وکٹوں پر 288 رنز کا مضبوط مجموعہ اسکور بورڈ پر سجایا۔ ہیتھر نائٹ نے 91 گیندوں پر 109 رنز کی دلکش اننگز کھیلی، جبکہ ایمی جونز نے 56 اور نیٹ برنٹ نے 38 رنز کا اضافہ کیا۔

بھارت کی جانب سے دیپتی شرما نے 4 وکٹیں حاصل کیں اور شری چرانی نے 2 کھلاڑیوں کو آؤٹ کیا۔

بھارتی ٹیم ہدف کے قریب پہنچ کر بھی میچ اپنے نام نہ کر سکی، بھارت نے 289 رنز کے تعاقب میں 6 وکٹوں کے نقصان پر 284 رنز بنائے، سمرتی مندھانا نے 84 اور کپتان ہرمن پریت کور نے 70 رنز کی اننگز کھیلیں، جب کہ دیپتی شرما کی نصف سنچری بھی بھارت کو فتح نہ دلا سکی۔

انگلینڈ کی جانب سے نیٹ برنٹ نے 2 وکٹیں حاصل کیں، جبکہ بیل، اسمتھ، ایکلسٹن اور ڈرین نے ایک ایک کھلاڑی کو پویلین بھیجا۔ شاندار پرفارمنس پر ہیتھر نائٹ کو میچ کی بہترین کھلاڑی قرار دیا گیا۔

دوسری جانب جنوبی افریقا نے پانچ میں سے چار میچز میں فتح حاصل کرکے 8 پوائنٹس کے ساتھ سیمی فائنل میں جگہ بنائی۔

اس سے قبل دفاعی چیمپئن آسٹریلیا سیمی فائنل میں پہنچنے والی پہلی ٹیم بنی تھی جس کے پوائنٹس کی تعداد 9 ہے، جبکہ بھارت اور نیوزی لینڈ 4،4 پوائنٹس کے ساتھ بالترتیب چوتھی اور پانچویں پوزیشن پر موجود ہیں۔