راولپنڈی ٹیسٹ کا پہلا روز: پاکستان نے 5 وکٹوں پر 259 رنز بنالیے

راولپنڈی: پاکستان اور جنوبی افریقہ کے درمیان ٹیسٹ سیریز کے دوسرے اور آخری میچ کے پہلے روز کے اختتام پر پاکستان نے 5 وکٹوں کے نقصان پر 259 رنز بنالیے۔

راولپنڈی میں کھیلے جانے والے میچ میں پاکستان نے ٹاس جیت کر بیٹنگ کا فیصلہ کیا، پاکستان کی پہلی وکٹ 35 رنز پر گر گئی، اوپنر امام الحق 17 رنز بنا کر اسپنر ہارمر کی گیند پر کلین بولڈ ہوگئے۔

امام الحق کے بعد 57 رنز بنانے والے عبداللہ شفیق بھی ہارمر کی گیند پر وکٹ گنوا بیٹھے، کپتان شان مسعود 87رنز بنا کر آئوٹ ہوئے۔

چوتھے نمبر پر آنے والے بابر اعظم پھر بڑی اننگز کھیلنے میں ناکام رہے اور جنوبی افریقہ کا ری ویو ضائع ہونے کے بعد مہاراج کی اگلی ہی گیند پر سلی مڈ آف پر کھڑے ٹونی ڈی زورزی نے شاندار کیچ لے کر انہیں پویلین کی راہ دکھا دی، وہ صرف 16 رنز سکور کر سکے۔

پاکستان کی پانچویں وکٹ 246 کے مجموعی اسکو پر گری جب محمد رضوان 19 رنز بناکر پویلین لوٹ گئے جبکہ سعود شکیل 42 اور سلمان آغا 10 رنز کیساتھ ناٹ آؤٹ ہیں۔

جنوبی افریقا کی جانب سے کیشو مہاراج اور سمن ہارمر نے 2،2 جبکہ کگیسو ربادا نے ایک وکٹ حاصل کی۔