صدر ٹرمپ کا کینیڈا کے ساتھ ٹیرف پر ہونے والے مذاکرات ختم کرنے کا اعلان

واشنگٹن:امریکہ کے صدر ڈونلڈ ٹرمپ نے ٹیرف کے معاملے پر تنقیدی اشتہار کے سبب کینیڈا کے ساتھ ہونے والے تمام تجارتی مذاکرات ختم کرنے کا اعلان کیا ہے۔

امریکی صدر کا کہنا تھا کہ کینیڈا نے سابق امریکی صدر رونالڈ ریگن سے متعلق دھوکا دہی سے دعویٰ کیا کہ وہ ٹیرف کے خلاف تھے، لیکن حقیقت یہ ہے کہ رونالڈ ریگن ٹیرف کے حامی تھے۔

انکا مزید کہنا تھا کہ صدر ریگن ٹیرف کو ملکی مفاد اور قومی سلامتی کیلئے ضروری سمجھتے تھے۔

صدر ٹرمپ نے الزام عائد کیا کہ کینیڈا ان کے ملک کی تاریخ کے سب سے اہم فیصلوں میں سے ایک میں امریکی سپریم کورٹ میں غیر قانونی طور پر اثر انداز ہونے کی کوشش کر رہا ہے۔

انھوں نے کہا کہ کینیڈا نے طویل عرصے سے ٹیرف پر دھوکہ دیا ہے، کینیڈا ہمارے کسانوں سے چار سو فیصد تک چارج کرتا ہے، اب کینیڈا اور کوئی دوسرا ملک امریکا سے مزید فائدہ نہیں اٹھا سکتا ہے۔