چین نے دنیا کا سب سے بڑا الیکٹرک کارگو جہاز لانچ کر دیا

چین نے دنیا کا سب سے بڑا الیکٹرک کارگو جہاز لانچ کر دیا ہے، جو روایتی ایندھن کے بجائے لیتھیئم بیٹریوں پر چلتا ہے۔

چائنیز خبر رساں ادارے کے مطابق، "گیزوبا” نامی جہاز کی لمبائی 130 میٹر ہے اور یہ 13 ہزار ٹن تک وزن اٹھانے کی صلاحیت رکھتا ہے۔ جہاز میں 12 لیتھیئم بیٹری پاور یونٹس نصب ہیں جو مجموعی طور پر 24 ہزار کلو واٹ بجلی فراہم کرتے ہیں۔

انجینیئرز کے مطابق، جہاز میں بیٹریاں تیزی سے تبدیل کرنے کی سہولت موجود ہے اور اس کی زیادہ سے زیادہ رینج 500 کلومیٹر تک ہے۔ اس میں جدید اسمارٹ کنٹرول سسٹم بھی نصب ہے جو ریموٹ نیویگیشن اور آٹومیٹک برتھنگ کی سہولت فراہم کرتا ہے۔

چائنیز اکیڈمی آف انجینیئرنگ کے رکن یِن شن پِنگ کا کہنا ہے کہ یہ جہاز صرف ایک نئی پروڈکٹ نہیں بلکہ ایک جامع تکنیکی کامیابی ہے، جس میں بڑی بیٹریاں، ڈی سی پاور سسٹمز اور ریموٹ پائلٹنگ ٹیکنالوجی کامیابی سے آزمایا گیا۔

چینی میڈیا کے مطابق، یہ الیکٹرک جہاز سالانہ 617 ٹن ایندھن کی بچت کرے گا اور کاربن کے اخراج میں 2 ہزار ٹن تک کمی لائے گا، جو گرین شپنگ انڈسٹری کے لیے اہم قدم ہے۔