آسٹریلوی کرکٹ ٹیم کے دورۂ پاکستان کا مجوزہ شیڈول سامنے آگیا

آسٹریلیا کی کرکٹ ٹیم 2026 کے آغاز میں پاکستان کا دورہ کرے گی، جہاں دو مرحلوں پر مشتمل وائٹ بال سیریز کھیلی جائے گی۔

ذرائع کے مطابق پہلے مرحلے میں تین ٹی ٹوئنٹی میچوں کی سیریز 30 جنوری سے 5 فروری تک شیڈول ہے، جو بھارت اور سری لنکا میں ہونے والے ٹی ٹوئنٹی ورلڈکپ 2026 سے قبل کھیلی جائے گی۔

ورلڈکپ کے بعد دوسرے مرحلے میں تین ایک روزہ میچوں کی سیریز 13 سے 19 مارچ تک کھیلی جائے گی۔

پاکستان کرکٹ بورڈ جلد ہی سیریز کے مقامات اور تفصیلی شیڈول کا باضابطہ اعلان کرے گا۔

کرکٹ آسٹریلیا کے سی ای او ٹوڈ گرین برگ نے ایک آن لائن پریس کانفرنس کے دوران پاکستان کے مجوزہ دورے پر خوشی کا اظہار کرتے ہوئے کہا کہ “مجھے یقین ہے کہ یہ پاکستان کا ایک اور شاندار دورہ ہوگا، پاکستان کے خلاف سیریز ہمارے کیلنڈر کا اہم حصہ ہے۔“

واضح رہے کہ پاکستان کی ٹیم نے نومبر 2024 میں آسٹریلیا کا دورہ کیا تھا، جہاں محمد رضوان کی قیادت میں گرین شرٹس نے ون ڈے سیریز 2-1 سے اپنے نام کر کے 2002 کے بعد آسٹریلیا میں پہلی تاریخی کامیابی حاصل کی تھی، تاہم میزبان ٹیم نے بعد میں ٹی ٹوئنٹی سیریز 3-0 سے جیت کر حساب برابر کر لیا تھا۔