بابر اعظم نے شاہد آفریدی کا ناپسندیدہ ریکارڈ برابر کردیا

قومی کرکٹ ٹیم کے کپتان اور مایہ ناز بلے باز بابر اعظم نے جنوبی افریقہ کے خلاف ٹی ٹوئنٹی سیریز کے پہلے میچ میں شاہد آفریدی کا ایک ناپسندیدہ ریکارڈ برابر کر دیا۔

بابر اعظم صرف دو گیندوں پر بغیر کوئی رن بنائے آؤٹ ہوگئے۔ انہیں جنوبی افریقہ کے بولر کوربن بوش نے پاور پلے کے آخری اوور میں پویلین بھیجا۔ اس اننگز کے ساتھ بابر اعظم نے ٹی ٹوئنٹی انٹرنیشنل کرکٹ میں آٹھویں مرتبہ صفر پر آؤٹ ہونے کا ریکارڈ شاہد آفریدی کے ساتھ برابر کردیا۔

اس ریکارڈ کے ساتھ بابر اعظم اب ان پاکستانی بلے بازوں کی فہرست میں تیسرے نمبر پر آ گئے ہیں جنہیں سب سے زیادہ مرتبہ بغیر رن بنائے آؤٹ ہونے کا سامنا کرنا پڑا۔ اس فہرست میں عمر اکمل، صائم ایوب اور کامران اکمل کے نام بھی شامل ہیں۔

یاد رہے کہ جنوبی افریقہ نے پہلے ٹی ٹوئنٹی میچ میں پاکستان کو 55 رنز سے شکست دی۔ 195 رنز کے ہدف کے تعاقب میں پاکستان کی ٹیم 18.1 اوورز میں 139 رنز پر آؤٹ ہوگئی۔ جنوبی افریقہ کی جانب سے کوربن بوش نے شاندار بولنگ کرتے ہوئے چار وکٹیں حاصل کیں، جبکہ ریزا ہینڈرکس نے 40 گیندوں پر 60 رنز کی عمدہ اننگز کھیل کر ٹیم کو فتح کی راہ پر گامزن کیا۔

پاکستان کی جانب سے محمد نواز نمایاں بولر رہے، جنہوں نے 26 رنز دے کر تین کھلاڑیوں کو آؤٹ کیا، جبکہ بلے بازوں میں صائم ایوب نے 37 اور نواز نے 36 رنز کی مزاحمتی اننگز کھیلی۔