جنگ بندی کے باوجود اسرائیلی حملے جاری، مزید 3 فلسطینی شہید

غزہ: غزہ میں اسرائیلی فوج کی جانب سے جنگ بندی کی خلاف ورزیاں جاری ہیں۔ آج شمالی اور جنوبی غزہ میں اسرائیلی فضائی حملوں کے نتیجے میں مزید تین فلسطینی شہید ہوگئے۔

ترکی نے غزہ میں جنگ بندی معاہدے پر عمل درآمد نہ ہونے پر تشویش کا اظہار کیا ہے اور اس حوالے سے پیر کو ایک اجلاس طلب کر لیا ہے۔ ترک وزیر خارجہ کے مطابق اجلاس میں مختلف ممالک کے وزرائے خارجہ بھی شرکت کریں گے۔

ادھر حماس نے دو یرغمالیوں کی لاشوں کی واپسی کے بعد اسرائیل کو 30 فلسطینیوں کی میتیں حوالے کیں۔ برطانوی میڈیا کے مطابق حماس کی جانب سے اب تک 15 یرغمالیوں کی لاشیں اسرائیل کے حوالے کی جا چکی ہیں، جبکہ حماس کے پاس مجموعی طور پر 28 یرغمالیوں کی لاشیں موجود ہیں۔