کین ولیمسن نے ٹی ٹوئنٹی کرکٹ سے ریٹائرمنٹ کا اعلان کر دیا

ویلنگٹن: نیوزی لینڈ کے اسٹار بیٹر اور سابق کپتان کین ولیمسن نے ٹی ٹوئنٹی انٹرنیشنل کرکٹ سے ریٹائر ہونے کا اعلان کیا ہے۔ نیوزی لینڈ کرکٹ نے تصدیق کی ہے کہ ولیمسن ویسٹ انڈیز کے خلاف آئندہ وائٹ بال سیریز میں حصہ نہیں لیں گے تاکہ دسمبر میں ہونے والی تین ٹیسٹ میچز کی سیریز پر مکمل توجہ دے سکیں۔

کین ولیمسن ٹی ٹوئنٹی انٹرنیشنل میں نیوزی لینڈ کی جانب سے دوسرے سب سے زیادہ رنز بنانے والے بیٹر ہیں۔ 2011 میں ٹی ٹوئنٹی ڈیبیو کرنے والے ولیمسن نے کیوی ٹیم کے لیے 93 میچز میں 2,575 رنز اسکور کیے، جن میں 18 نصف سنچریاں شامل ہیں۔

انہوں نے 75 ٹی ٹوئنٹی میچز میں نیوزی لینڈ کی قیادت بھی کی اور بلیک کیپس کو 2 مرتبہ سیمی فائنل (2016 اور 2022) اور ایک مرتبہ فائنل (2021) تک پہنچایا۔

ریٹائرمنٹ کے فیصلے پر ولیمسن نے کہا، "مجھے محسوس ہوا کہ اب وقت آگیا ہے کہ میں ٹی ٹوئنٹی سے ایک قدم پیچھے ہٹ جاؤں۔ یہ میرے اور ٹیم کے لیے درست وقت ہے۔ اس سے ٹیم کو آئندہ سیریز اور ٹی ٹوئنٹی ورلڈ کپ کے لیے واضح سمت ملے گی۔”

انہوں نے نئے کپتان مچل سینٹنر کو شاندار لیڈر قرار دیتے ہوئے ٹیم کے مستقبل پر اعتماد کا اظہار بھی کیا۔ واضح رہے کہ ولیمسن ون ڈے اور ٹیسٹ کرکٹ کھیلتے رہیں گے۔