استنبول میں آج غزہ امن اجلاس،پاکستان اسرائیلی فوج کے انخلا کا مطالبہ کرے گا

استنبول میں آج غزہ امن منصوبے پر مشاورتی اجلاس، پاکستان مکمل جنگ بندی اور اسرائیلی فوج کے انخلا کا مطالبہ کرے گا

ترکیہ کے شہر استنبول میں آج غزہ امن منصوبے پر مشاورتی اجلاس ہو رہا ہے، جس میں پاکستان سمیت آٹھ ممالک کے وزرائے خارجہ شرکت کریں گے۔ پاکستان کی نمائندگی نائب وزیراعظم اور وزیر خارجہ اسحاق ڈار کریں گے۔

اجلاس میں سعودی عرب، قطر، متحدہ عرب امارات، انڈونیشیا، اردن اور مصر کے وزرائے خارجہ بھی شریک ہوں گے۔ یہ اجلاس جنگ بندی کے نفاذ، انسانی امداد کی فراہمی اور غزہ میں رکاوٹوں کے حل کے لیے مشترکہ حکمت عملی طے کرنے کے مقصد سے منعقد کیا جا رہا ہے۔

دفتر خارجہ کے ترجمان طاہر اندرابی کے مطابق پاکستان اجلاس میں جنگ بندی معاہدے پر مکمل عملدرآمد اور مقبوضہ فلسطینی علاقوں سے اسرائیلی فوج کے انخلا کا مطالبہ کرے گا۔ پاکستان غزہ میں بلا رکاوٹ انسانی امداد اور تعمیر نو پر زور دے گا اور فلسطینی عوام کے لیے آزاد، قابلِ بقا اور متصل ریاست کے قیام کی ضرورت کو دہرائے گا۔

ترجمان نے کہا کہ فلسطینی ریاست کا دارالحکومت القدس الشریف ہونا چاہیے اور پاکستان فلسطینی عوام کے حق خودارادیت اور انصاف کے لیے پرعزم ہے۔

یاد رہے کہ غزہ میں گزشتہ ماہ سے جاری اسرائیلی حملوں میں 236 فلسطینی شہید اور 600 سے زائد زخمی ہو چکے ہیں۔