پاکستانی نژاد نیما شیخ نے اسکاٹ لینڈ کی تاریخ رقم کر دی

لاہور: پاکستانی نژاد اسکاٹش ویمن کرکٹر نیما شیخ اسکاٹ لینڈ نیشنل اسپورٹس اسکالرشپ حاصل کرنے والی پہلی کرکٹر بن گئی ہیں۔

کرکٹ اسکاٹ لینڈ کے مطابق نیما شیخ کو "وننگ اسٹوڈنٹس 100 اسکاٹ لینڈ نیشنل اسپورٹ اسکالرشپ” کے لیے منتخب کیا گیا ہے، وہ یہ اعزاز حاصل کرنے والی اسکاٹ لینڈ کرکٹ کی پہلی خاتون کھلاڑی ہیں۔

کرکٹ اسکاٹ لینڈ کا کہنا ہے کہ اسکاٹش اسپورٹس پروگرام کے تحت 1700 سے زائد اسٹوڈنٹ ایتھلیٹس کو سپورٹ فراہم کی جارہی ہے۔ اسکالرشپ اُن ایتھلیٹس کو دی جاتی ہے جو اپنی اکیڈمک کارکردگی اور کھیلوں میں نمایاں کامیابیوں کی بنیاد پر اہل قرار پاتے ہیں۔

گلاسگو یونیورسٹی میں اکاؤنٹینسی اور فنانس کی تعلیم حاصل کرنے والی نیما شیخ نے کہا کہ "میرے لیے یہ اعزاز کی بات ہے کہ میں اس اسکالرشپ کی پہلی کرکٹر بنی، اس سے مجھے کھیل اور تعلیم دونوں میں بہتر کارکردگی دکھانے کا موقع ملے گا۔”

واضح رہے کہ نیما شیخ نے 2023 میں انٹرنیشنل ڈیبیو کیا تھا اور اب تک 2 ون ڈے اور 7 ٹی ٹوئنٹی میچز میں اسکاٹ لینڈ کی نمائندگی کرچکی ہیں۔