چھٹی اسلامی یکجہتی گیمز،پاکستانی عروشہ سعید نے کانسی کا تمغہ جیت لیا

ریاض: پاکستان کی عروشہ سعید نے ریاض میں منعقدہ چھٹے اسلامی یکجہتی کھیلوں میں خواتین کی 57 کلوگرام کیٹیگری میں کراش (Kurash) مقابلے میں کانسی کا تمغہ جیت کر پاکستان کا سر فخر سے بلند کر دیا۔

یہ پاکستان کا پہلا میڈل ہے جو چھٹے اسلامی یکجہتی کھیلوں 2025 میں حاصل ہوا۔ عروشہ نے غیر معمولی مہارت، حوصلے اور صلاحیت کا مظاہرہ کرتے ہوئے دنیا کی بہترین کراش کھلاڑیوں کے خلاف شاندار مقابلہ کیا۔

پاکستانی کراش ٹیم کی قیادت ہیڈ کوچ محمد سعد نے کی جبکہ محمد رفیق اور شاہزیب نواز نے کھلاڑیوں کی تربیت اور تیاری میں اہم کردار ادا کیا۔ ان کی انتھک محنت اور رہنمائی نے ٹیم کو یہ کامیابی دلانے میں بنیادی کردار ادا کیا۔