پاکستان منشیات کے خلاف فرنٹ لائن ملک قرار،اقوامِ متحدہ کی تعریف

اقوامِ متحدہ کے ادارہ برائے منشیات و جرائم نے پاکستان کی منشیات کے خلاف کارروائیوں کا عالمی سطح پر اعتراف کیا ہے۔ پاکستان میں اقوامِ متحدہ کے نمائندہ خصوصی ٹرولز ویسٹر نے انسدادِ منشیات میں پاکستان کو فرنٹ لائن ملک قرار دیتے ہوئے کہا کہ اینٹی نارکوٹکس فورس کی کامیابیاں ظاہر کرتی ہیں کہ پاکستان منشیات کے خلاف ایک کلیدی کردار ادا کر رہا ہے۔

ٹرولز ویسٹر نے بتایا کہ افغانستان میں پوست اور ہیروئن کی بجائے مصنوعی منشیات کی لیبارٹریاں قائم ہو رہی ہیں اور انسدادِ منشیات کے لیے ایک اہم عالمی روڈ میپ جاری کیا گیا ہے۔

نمائندہ خصوصی نے کہا کہ پاکستان کو منشیات کے خلاف جنگ میں اکیلا نہیں چھوڑا جا سکتا اور عالمی برادری کا تعاون ناگزیر ہے۔ پاکستان نے گزشتہ ایک سال میں 365 میٹرک ٹن منشیات اور کیمیکل ضبط کیے، جو منظم جرائم کے خلاف اس کی مؤثر حکمت عملی کی دلیل ہیں۔