امریکی صدر کا روس،یوکرین جنگ خاتمے سے متعلق بڑا دعویٰ

واشنگٹن: امریکی صدر ڈونلڈ ٹرمپ نے دعویٰ کیا ہے کہ روس اور یوکرین کے درمیان جاری جنگ کے خاتمے کے لیے معاہدے کا عمل حتمی مراحل میں داخل ہو گیا ہے۔

وائٹ ہاؤس میں تھینکس گیونگ کی تقریب سے خطاب میں ٹرمپ نے کہا کہ اس جنگ میں ہزاروں فوجی ہلاک ہو چکے ہیں، تاہم امن معاہدے کے مسودے پر غیر معمولی پیش رفت ہوئی ہے۔ انہوں نے بتایا کہ صرف نو ماہ میں انہوں نے آٹھ جنگیں رکوائی ہیں اور اب روس-یوکرین جنگ کے خاتمے کے لیے بھی حتمی کوششیں جاری ہیں۔

صدر ٹرمپ نے اپنے خصوصی نمائندے اسٹیو وٹکوف کو ماسکو بھیجنے کی ہدایت کی ہے تاکہ روسی صدر سے ملاقات کر کے معاہدے کے باقی نکات طے کیے جا سکیں۔ ان کے مطابق معاہدے میں اب صرف چند اختلافی امور باقی ہیں۔

وائٹ ہاؤس نے بھی تصدیق کی ہے کہ امن منصوبے میں بڑی پیش رفت ہوئی ہے، تاہم کچھ حساس نکات پر مزید بات چیت کی ضرورت ہے۔ چند روز قبل امریکی اور یوکرینی حکام نے جنیوا میں 28 نکاتی امریکی امن تجویز پر مذاکرات کیے تھے، جس کے بعد دونوں ممالک نے ایک نئے فریم ورک پر کام شروع کرنے کا اعلان کیا تھا۔

واضح رہے کہ ٹرمپ نے یوکرین کو امن معاہدہ قبول کرنے کے لیے 27 نومبر کی ڈیڈ لائن بھی دے رکھی ہے۔