نیپال پریمیئر لیگ میں سٹے بازی،9 بھارتی جواری گرفتار

 

کٹھمنڈو: نیپال پریمیئر لیگ کے دوران بڑے سٹے بازی کے سکینڈل میں نیپال پولیس نے کارروائی کرتے ہوئے 9 بھارتی شہریوں اور ایک نیپالی کو گرفتار کر لیا، جو مبینہ طور پر آن لائن غیر قانونی بیٹنگ نیٹ ورک چلا رہے تھے۔

پولیس کے مطابق گرفتار بھارتی باشندے ریاست آندھرا پردیش سے تعلق رکھتے ہیں اور ان کی عمریں 19 سے 35 سال کے درمیان ہیں۔ سمکھوسی، کٹھمنڈو میں کرائے کے مکان پر چھاپے کے دوران آٹھ افراد کو رنگے ہاتھوں پکڑا گیا، جہاں سے 15 موبائل فون، ڈیجیٹل ریکارڈز اور بیٹنگ ڈیٹا ضبط کیا گیا۔

ایک روز بعد کی کارروائی میں مزید ایک بھارتی اور ایک نیپالی شہری کو بھی گرفتار کیا گیا، جس کے بعد مجموعی تعداد 10 تک پہنچ گئی۔ پولیس ترجمان ایس پی کاجی کمار آچاریا کے مطابق ابتدائی تفتیش میں معلوم ہوا کہ گروہ تقریباً 5 لاکھ نیپالی روپے کے حجم سے بیٹنگ کر رہا تھا، جبکہ دیگر شواہد کے مطابق اس نیٹ ورک کا مالی حجم 2 کروڑ 50 لاکھ روپے (تقریباً 1.75 لاکھ امریکی ڈالر) تک پہنچ سکتا ہے۔

مزید تحقیقات میں یہ بھی سامنے آیا کہ ملزمان کرپٹو کرنسی کے ذریعے غیر قانونی ٹرانزیکشنز میں ملوث تھے، جس سے کیس کی سنگینی میں اضافہ ہوا ہے۔