مودی انتظامیہ کا کشمیر ٹائمز دفتر پر چھاپہ،اسلحہ دعویٰ بے بنیاد قرار

مقبوضہ کشمیر: بھارتی پولیس نے کشمیر ٹائمز کے دفتر پر چھاپہ مارا، جس پر عالمی صحافتی تنظیموں نے شدید تشویش کا اظہار کیا ہے۔

انٹرنیشنل فیڈریشن آف جرنلسٹس (IFJ) کے مطابق بھارتی حکام نے دفتر پر کارروائی اس بنیاد پر کی کہ ادارہ مبینہ طور پر علیحدگی پسند نظریات پھیلا رہا ہے۔ IFJ نے کہا کہ کشمیر ٹائمز میں حال ہی میں شائع مضمون “ایس آئی اے کے چھاپے: ہمیں خاموش کرنے کی ایک اور کوشش” نے عوام میں غیر معمولی توجہ حاصل کی، جس کے بعد کارروائی تیز کی گئی۔

اسپیشل انویسٹی گیشن ایجنسی (SIA) نے دعویٰ کیا کہ چھاپے کے دوران اسلحہ، گولہ بارود اور ڈیجیٹل ڈیوائسز برآمد کی گئیں، تاہم کشمیر ٹائمز نے ان الزامات کو بے بنیاد قرار دیا۔

اخبار کے مطابق حکومت پر تنقید جمہوریت کا حصہ ہے اور بھارتی کارروائیاں آزادی صحافت کو محدود کرنے کی کوششوں کا تسلسل ہیں۔ عالمی صحافتی تنظیموں نے بھی کہا کہ بھارت مقبوضہ کشمیر میں میڈیا پر دباؤ بڑھا کر اختلافی آوازوں کو خاموش کرنے کی کوشش کر رہا ہے، جو آئینی آزادیوں کی خلاف ورزی ہے۔

IFJ نے بھارت سے مطالبہ کیا کہ صحافتی اداروں کے خلاف کارروائیاں فوری طور پر روکی جائیں اور آزاد میڈیا کو اپنا کام کرنے دیا جائے۔