ہیڈ کوچ مائیک ہیسن چھٹیوں کے لیے نیوزی لینڈ روانہ

 

لاہور — پاکستان وائٹ بال کرکٹ ٹیم کے ہیڈ کوچ مائیک ہیسن ٹرائی نیشن ٹی ٹوئنٹی سیریز کے اختتام کے بعد چھٹیاں گزارنے کے لیے اپنے وطن نیوزی لینڈ روانہ ہو گئے۔

نیوزی لینڈ روانگی سے قبل سوشل میڈیا پر جاری بیان میں مائیک ہیسن نے کہا، "میرا چہرہ تھکا ہوا ہے لیکن میں خوش ہوں، میں اپنے گھر واپس جانے کے لیے ایک لمبے سفر کا آغاز کر رہا ہوں۔”

انہوں نے مزید کہا کہ وہ اپنی فیملی کو مس کر رہے ہیں اور چند ہفتے اپنے گھر کے ساتھ ساتھ گرم موسم بھی ان کا انتظار کر رہا ہے۔ ہیڈ کوچ نے پاکستان ٹیم کی کارکردگی کی تعریف کرتے ہوئے کہا کہ "جیت کے ساتھ سیزن کے اختتام کی وجہ سے میں بہت خوش ہوں، لڑکوں نے بہت اچھا کھیلا۔”

آئندہ چند ہفتوں میں پاکستان وائٹ بال ٹیم کی مصروفیات کم ہیں۔ پاکستان ٹی ٹوئنٹی اسکواڈ جنوری کے پہلے ہفتے میں 3 میچز کے لیے سری لنکا کا دورہ کرے گا، جبکہ آسٹریلیا کی ٹی ٹوئنٹی ٹیم کا دورہ پاکستان جنوری کے آخری ہفتے میں شیڈول ہے۔ اس ہوم سیریز کے بعد پاکستان ٹیم ٹی ٹوئنٹی ورلڈ کپ کے لیے سری لنکا جائے گی۔

یاد رہے کہ پاکستان نے سہ ملکی ٹی ٹوئنٹی سیریز کے فائنل میں سری لنکا کو 6 وکٹوں سے شکست دی تھی۔