بہار میں نقاب کھینچنا عورت کی عزت پر سنگین حملہ ہے،ایمنسٹی انٹرنیشنل

انسانی حقوق کی عالمی تنظیم ایمنسٹی انٹرنیشنل انڈیا نے بھارتی ریاست بہار میں ایک خاتون کے نقاب کھینچنے کے واقعے کو عورت کی عزت، شناخت اور ذاتی آزادی پر سنگین حملہ قرار دیا ہے۔

تنظیم کے بیان میں کہا گیا کہ عوامی عہدے داروں کی جانب سے ایسے اقدامات نہ صرف خواتین کے بنیادی حقوق کی خلاف ورزی ہیں بلکہ معاشرے میں خوف اور عدم تحفظ کا ماحول بھی پیدا کرتے ہیں۔ ایمنسٹی نے زور دیا کہ عوامی عہدیداران کو مذہبی آزادی اور خواتین کے وقار کا احترام کرنا چاہیے۔

یہ واقعہ پٹنہ میں ایک تقریب کے دوران پیش آیا، جہاں وزیراعلیٰ نتیش کمار نے ایک مسلمان خاتون ڈاکٹر کا نقاب زبردستی کھینچ دیا۔ واقعے کی ویڈیوز سوشل میڈیا پر وائرل ہونے کے بعد شدید ردعمل سامنے آیا۔

بھارت میں انسانی حقوق کے کارکنوں اور سماجی رہنماؤں نے واقعے کو اقلیتی خواتین کے تحفظ کے حوالے سے تشویشناک قرار دیا اور ذمہ داران کے خلاف فوری، شفاف اور قانونی کارروائی کا مطالبہ کیا۔

دوسری جانب اپوزیشن جماعت کانگریس نے بھی اس اقدام کی سخت مذمت کی اور کہا کہ کسی خاتون کے لباس یا مذہبی شناخت کے ساتھ ایسا رویہ ناقابل قبول اور غیر اخلاقی ہے۔ وزیراعلیٰ کے خلاف ہراسمنٹ کا مقدمہ درج کرنے کی بھی درخواست زور پکڑ رہی ہے۔