چین کی وینزویلا کے حق میں کھلی حمایت

چین نے وینزویلا کی کھل کر حمایت کا اعلان کرتے ہوئے کہا ہے کہ وہ بین الاقوامی معاملات میں یکطرفہ دباؤ اور غنڈہ گردی کی مخالفت کرتا ہے۔

غیر ملکی خبر رساں ادارے روئٹرز کے مطابق چین کے وزیر خارجہ وانگ یی نے وینزویلا کے ہم منصب ایوان گل سے ٹیلی فونک گفتگو کے دوران اس بات کا اظہار کیا کہ چین وینزویلا سمیت تمام ممالک کی خودمختاری اور اس کے تحفظ کے حق کی حمایت کرتا ہے۔ وانگ یی نے کہا کہ چین اور وینزویلا اسٹریٹجک شراکت دار ہیں اور باہمی اعتماد و تعاون دونوں ممالک کے دوطرفہ تعلقات کی ایک دیرینہ روایت ہے۔

چینی وزارتِ خارجہ کے بیان میں کہا گیا کہ چین وینزویلا کے ساتھ تعلقات کو مزید مضبوط بنانے اور باہمی احترام کی بنیاد پر تعاون کو فروغ دینے کے لیے تیار ہے، خاص طور پر ایسے وقت میں جب وینزویلا بیرونی دباؤ اور پابندیوں کا سامنا کر رہا ہے۔

سیاسی مبصرین کے مطابق چین کا یہ بیان امریکی پالیسیوں کے تناظر میں ایک واضح سفارتی پیغام ہے، جس میں بیجنگ نے وینزویلا کے مؤقف کی حمایت کی اور یکطرفہ امریکی اقدامات پر تنقید بھی کی ہے۔

واضح رہے کہ چند دن قبل امریکی صدر ڈونلڈ ٹرمپ نے وینزویلا کے بارے میں سخت بیان دیا تھا، جس میں انہوں نے کہا تھا کہ جلد وہاں زمینی کارروائی کی جا سکتی ہے اور امریکی اقدامات کے بعد منشیات کی اسمگلنگ میں کمی آئی ہے۔ اس کے علاوہ امریکا نے وینزویلا کے ساحل کے قریب تیل بردار جہاز کو بھی قبضے میں لیا تھا، جس سے علاقائی تناؤ میں اضافہ ہوا ہے۔