پالتو کتے کے بیمار ہونے کی وجہ سے دو بہنوں کی خودکشی

لکھنو، بھارت: بھارتی شہر لکھنو کے علاقے ڈوڈا کھیڑا جلال پور میں دو بہنوں نے مبینہ طور پر اپنے پالتو کتے کے بیمار ہونے کی وجہ سے خودکشی کرلی۔

پولیس کے مطابق 26 سالہ رادھا سنگھ اور 22 سالہ جیا سنگھ نے پینائل پی کر اپنی زندگی کا خاتمہ کیا۔ تحقیقات کے دوران معلوم ہوا کہ دونوں بہنوں نے حال ہی میں ایک کتا گود لیا تھا اور وہ اس کے بہت قریب تھیں، دونوں کا ڈپریشن کتے کی بیماری سے مزید بڑھ گیا۔

اہلیہ خانہ کے مطابق دونوں بہنیں ذہنی تناؤ کا شکار تھیں؛ ایک بہن کو ٹی بی کی بیماری کی وجہ سے ڈپریشن تھا جبکہ دوسری بہن 2014 سے ذہنی دباؤ میں مبتلا تھی۔ پالتو کتے کے بیمار ہونے کے بعد دونوں کی ذہنی کیفیت مزید خراب ہوئی اور انہوں نے یہ انتہائی قدم اٹھایا۔

پولیس نے لاشیں تحویل میں لے کر پوسٹ مارٹم کے لیے بھیج دی ہیں جبکہ کیس کی مزید تحقیقات جاری ہیں۔