رونالڈو کی ویڈیو وائرل، ’’انشاءاللہ ایک ہزار گول کروں گا‘‘

پرتگال کے عالمی شہرت یافتہ فٹبال اسٹار کرسٹیانو رونالڈو نے مسلسل تیسری بار مشرق وسطیٰ بہترین فٹبالر آف دی ایئر کا اعزاز حاصل کر لیا ہے۔ یہ ایوارڈ دبئی میں منعقد ہونے والی گلوب سوکر ایوارڈز کی تقریب میں رونالڈو کو دیا گیا۔

رونالڈو نے اس اعزاز کے لیے کریم بنزیما، سالم الدوسری اور ریاض محرز جیسے نمایاں کھلاڑیوں کو پیچھے چھوڑا۔ سال 2025 کے دوران انہوں نے تمام مقابلوں میں مجموعی طور پر 40 گول اسکور کیے، جو ان کی شاندار فارم اور مستقل کارکردگی کا مظہر ہیں۔

اس وقت 40 سالہ اسٹار سعودی عرب کے معروف کلب النصر کی نمائندگی کر رہے ہیں اور ان کا معاہدہ 2027 کے وسط تک جاری ہے۔ ایوارڈ وصول کرتے ہوئے رونالڈو نے جذباتی تقریر میں کہا کہ مزید کھیلنا مشکل ضرور ہے، لیکن میرا جذبہ بلند ہے اور اگر انجری نہ ہوئی تو انشاءاللہ ایک ہزار گول کرنے کا ہدف حاصل کروں گا۔

ان کے اس جملے کی ویڈیو سوشل میڈیا پر وائرل ہو گئی ہے اور مداحوں کے درمیان بڑی پذیرائی حاصل کر رہی ہے۔