نصف صدی بعد کراچی میں ڈبل ڈیکر بس سروس کا آغاز

کراچی : شہر قائد میں تقریباً نصف صدی کے بعد  ڈبل ڈیکر بس سروس کا آغاز کر دیا گیا۔

سندھ کے سینئر وزیر شرجیل میمن اور صوبائی وزیر ناصر شاہ نے ڈبل ڈیکر بسوں کا افتتاح کیا، اس موقع پر حکام کی جانب سے شرجیل انعام میمن کو بسوں کی خصوصیات سے متعلق بریفنگ دی گئی۔

حکام کے مطابق ابتدائی طور پر 5 ڈبل ڈیکر بسیں ملیر ہالٹ سے فوارہ چوک تک چلیں گی، ڈبل ڈیکر بس کا روٹ 22 کلومیٹر پر مشتمل ہو گا، ڈبل ڈیکر بسوں کا کم از کم کرایہ 80 روپے جبکہ زیادہ سے زیادہ 120 روپے ہوگا۔

اس موقع پر سینئر صوبائی وزیر سندھ شرجیل میمن نے میڈیا سے گفتگو کرتے ہوئے کہا کہ عوام سے وعدہ کیا تھا دسمبر میں ڈبل ڈیکر بسیں کراچی آ جائیں گی، کل سے ڈبل ڈیکر بسیں عوام کیلئے چلا دی جائیں گی، تجربہ بہتر ہوگا تو ڈبل ڈیکر بس کی بڑی فلیٹ منگوائیں گے۔

ان کا کہنا تھا کہ شہریوں کو سفری سہولیات فراہم کر رہے ہیں، بی آر ٹی جلدی مکمل کرنے کی کوشش کر رہے ہیں، امید ہے مارچ یا اپریل تک کافی حد تک سڑکوں کے مسائل حل ہو جائیں گے۔