نئی امنگوں اور امیدوں کے ساتھ 2026 کا پہلا سورج طلوع ہو گیا

نئی امنگوں، امیدوں اور خوابوں کے ساتھ سال 2026 کا پہلا سورج پوری آب و تاب کے ساتھ طلوع ہو گیا، جس نے نئے سال کے آغاز کو خوشگوار اور پُرامید بنا دیا۔

نئے سال کے پہلے سورج کے دیدار کے لیے شہری بڑی تعداد میں ساحلی علاقوں، پارکوں اور کھلے مقامات پر پہنچے، جہاں انہوں نے اس یادگار لمحے کو کیمروں میں محفوظ کیا اور ایک دوسرے کو نئے سال کی مبارکباد دی۔

سال کے آغاز پر ملک بھر کی مساجد میں ملکی سلامتی، استحکام اور خوشحالی کے لیے خصوصی دعائیں کی گئیں۔ علما کرام نے دعا کی کہ اللہ تعالیٰ پاکستان کو درپیش مشکلات سے نجات عطا فرمائے اور ملک کو ترقی و خوشحالی کی راہ پر گامزن کرے۔

شہریوں کا کہنا تھا کہ پوری قوم کو 2026 میں معاشی بہتری اور مثبت تبدیلیوں کی اُمید ہے۔ عوام نے دعا کی کہ نیا سال سب کے لیے خوشیاں، سکون اور کامیابیاں لے کر آئے اور یہ سال نئی امیدوں اور مضبوط حوصلوں کا پیغام ثابت ہو۔

لوگوں نے اس عزم کا اظہار کیا کہ وہ مثبت سوچ، محنت اور اتحاد کے ساتھ نئے سال کا آغاز کر رہے ہیں، جبکہ کئی شہریوں کا کہنا تھا کہ انہیں اُمید ہے کہ 2026 میں وہ خواب بھی پورے ہوں گے جو گزشتہ برس ادھورے رہ گئے تھے۔

واضح رہے کہ رات 12 بجتے ہی ملک بھر میں نئے سال کے استقبال کے لیے آتش بازی اور جشن کا سلسلہ شروع ہو گیا۔ کراچی، لاہور، اسلام آباد سمیت مختلف شہروں میں شاندار آتش بازی کی گئی جبکہ نوجوانوں اور خاندانوں نے سڑکوں اور عوامی مقامات پر جشن منایا۔