ترکی وینزویلا کے عوام کے ساتھ کھڑا رہے گا، اردوان کا اعلان

ترکی کے صدر رجب طیب اردوان نے امریکی صدر ڈونلڈ ٹرمپ کو ٹیلی فونک گفتگو میں واضح طور پر آگاہ کیا ہے کہ وینزویلا کو صدر نکولس مادورو کی معزولی کے بعد عدم استحکام کی طرف نہیں دھکیلا جانا چاہیے۔

کابینہ اجلاس کے بعد میڈیا سے گفتگو میں صدر اردوان نے کہا کہ ترکی وینزویلا کے عوام کے ساتھ کھڑا رہے گا اور موجودہ صورتحال میں ان کی حمایت جاری رکھے گا۔

انہوں نے کہا کہ ماضی میں صدر مادورو اور وینزویلا کے عوام نے ترک قوم کے ساتھ دوستی کا ثبوت دیا ہے۔ صدر اردوان نے خبردار کیا کہ ممالک کی خودمختاری اور بین الاقوامی قوانین کی خلاف ورزی عالمی سطح پر سنگین مسائل پیدا کر سکتی ہے۔

انہوں نے زور دیا کہ اصولوں پر مبنی بین الاقوامی نظام کا تحفظ ناگزیر ہے اور تنازعات کا حل طاقت کے بجائے مکالمے سے نکالا جانا چاہیے۔

خیال رہے کہ امریکی افواج نے کاراکاس میں کارروائی کرتے ہوئے صدر مادورو کو حراست میں لے کر امریکا منتقل کیا، جہاں ان کے خلاف قانونی کارروائی جاری ہے۔ صدر مادورو نے نیویارک کی عدالت میں منشیات اسمگلنگ کے الزامات میں خود کو بے قصور قرار دیا۔