پی ایس ایل 11،دو نئی ٹیموں کی نیلامی کے لیے ریہرسلز مکمل

اسلام آباد: پاکستان سپر لیگ (پی ایس ایل) کے گیارہویں ایڈیشن میں دو نئی ٹیموں کے اضافے کے لیے نیلامی کی تقریب کی ریہرسلز مکمل کر لی گئی ہیں۔ جناح کنونشن سینٹر رنگ برنگی روشنیوں سے مزین ہے اور بڈرز و مہمانوں کے استقبال کے انتظامات مکمل کر لیے گئے ہیں۔

پی سی بی کے چیف آپریٹنگ آفیسر سمیر احمد سید نے کنونشن سینٹر کا دورہ کیا اور نیلامی کے انتظامات پر بریفنگ لی۔ ڈائریکٹر میڈیا عامر میر، ڈائریکٹر کمرشل علی عدنان زیدی اور چیف فنانشل آفیسر جاوید مرتضی بھی میٹنگ میں موجود تھے۔

تقریب میں سوئنگ کے سلطان وسیم اکرم بھی منفرد انداز میں حصہ لیں گے جبکہ رائزنگ ایشیا کپ جیتنے والی پاکستان شاہینز اور ہانگ کانگ سپر سکسز جیتنے والی پاکستان ٹیم کو بھی مدعو کیا گیا ہے۔ چیئرمین پی سی بی کی ہدایت پر دونوں ٹیموں کی کارکردگی کو سراہا جائے گا اور کھلاڑیوں کو انعامات بھی دیے جائیں گے۔

دنیا بھر کے پی ایس ایل فینز یہ رنگا رنگ تقریب پی سی بی کے یوٹیوب چینل، پی ٹی وی سپورٹس، اے اسپورٹس اور جیو سوپر پر لائیو دیکھ سکیں گے۔