جو فرعون اوررضا شاہ کے ساتھ ہوا وہی ٹرمپ کیساتھ ہوگا،آیت اللہ خامنہ ای

تہران: ایران کے سپریم لیڈر آیت اللہ خامنہ ای نے کہا ہے کہ غرور میں ڈوبا حکمران دنیا کے فیصلے کر رہا ہے، لیکن فرعون، نمرود اور رضا شاہ کے ساتھ جو ہوا، وہی مستقبل میں ڈونلڈ ٹرمپ کے ساتھ بھی ہو گا۔

انہوں نے سوشل میڈیا پر بیان دیا کہ طاقتور حکمرانوں کے ساتھ تاریخ میں کیا ہوا، اسے موجودہ حکمران بھی سمجھیں۔

واضح رہے کہ ایرانی صدر مسعود پزشکیان نے امریکا اور اسرائیل کو ایران میں جاری فسادات کا ذمہ دار قرار دیا ہے۔ انہوں نے کہا کہ امریکا اور اسرائیل عوام میں تخریب کاری کروا رہے ہیں، تاہم پرامن احتجاج عوام کا حق ہے اور غیر ملکی عناصر کو انتشار پھیلانے کی اجازت نہیں دی جائے گی۔

دوسری جانب امریکا کے صدر ڈونلڈ ٹرمپ نے کہا ہے کہ ایران مذاکرات کرنا چاہتا ہے اور ملاقات کے انتظامات ہو رہے ہیں، جبکہ ایران کے خلاف طاقتور آپشنز پر غور جاری ہے۔