پاکستان کا مقبوضہ کشمیر میں علماء و مساجد کی پروفائلنگ پر احتجاج

اسلام آباد: پاکستان نے مقبوضہ جموں و کشمیر میں بھارتی حکام کی جانب سے علما، مساجد اور مسجد مینجمنٹ کمیٹیوں کی مبینہ پروفائلنگ کی شدید مذمت کی ہے۔

وزارت خارجہ کے بیان میں کہا گیا کہ یہ اقدام مذہبی امور میں کھلی مداخلت ہے اور مذہبی آزادی اور عقیدے کے بنیادی حق کی سنگین خلاف ورزی کے مترادف ہے۔

اس کا مقصد مقبوضہ علاقے کی مسلم آبادی کو خوفزدہ کرنا اور انہیں تنہائی میں دھکیلنا ہے۔

دفتر خارجہ نے کہا کہ مذہبی شخصیات سے ذاتی معلومات، تصاویر اور مسلکی وابستگیوں کی تفصیلات اکٹھی کرنا منظم ہراسانی کے زمرے میں آتا ہے اور نمازیوں میں خوف پیدا کرنے کے لیے کیا جا رہا ہے۔

بیان میں مزید کہا گیا کہ یہ اقدامات ہندوتوا نظریے اور اسلاموفوبیا پر مبنی پالیسیوں کا حصہ ہیں، اور مساجد و مسلم علما کو نشانہ بنانا ان پالیسیوں کے امتیازی اور فرقہ وارانہ کردار کا ثبوت ہے۔

پاکستان جموں و کشمیر کے عوام کے ناقابلِ تنسیخ حق کی حمایت جاری رکھے گا اور مذہبی جبر و عدم برداشت کے خلاف اپنی آواز بلند کرتا رہے گا۔