بنگلادیش نے آئی سی سی کی ڈیڈ لائن سے متعلق خبروں کی تردید کر دی

 

ٹی ٹوئنٹی ورلڈ کپ میں بنگلادیشی ٹیم کے میچز کے وینیو سے متعلق صورتحال بدستور غیر یقینی ہے، تاہم بنگلادیش کرکٹ بورڈ (بی سی بی) نے ان خبروں کو مسترد کر دیا ہے جن میں دعویٰ کیا گیا تھا کہ انٹرنیشنل کرکٹ کونسل (آئی سی سی) نے بنگلادیش کو کسی حتمی ڈیڈ لائن سے آگاہ کر دیا ہے۔

بی سی بی میڈیا کمیٹی کے ڈائریکٹر امزاد حسین نے وضاحت کرتے ہوئے کہا ہے کہ آئی سی سی کی جانب سے بنگلادیش کو وینیو کے معاملے پر کوئی مخصوص تاریخ یا ڈیڈ لائن نہیں دی گئی۔ ان کے مطابق بنگلادیش کرکٹ بورڈ نے اپنے میچز کے وینیو میں تبدیلی کی باقاعدہ درخواست آئی سی سی کو ارسال کر رکھی ہے، جس پر تاحال غور کیا جا رہا ہے۔

امزاد حسین کا کہنا تھا کہ وینیو کے حوالے سے حتمی فیصلہ آئی سی سی تمام متعلقہ فریقین سے مشاورت کے بعد کرے گی۔ انہوں نے بتایا کہ بنگلادیش کرکٹ بورڈ مسلسل آئی سی سی کے ساتھ رابطے میں ہے اور معاملہ طے شدہ قواعد و ضوابط کے تحت حل کیا جائے گا۔

واضح رہے کہ حالیہ دنوں بھارتی میڈیا میں رپورٹس سامنے آئی تھیں جن میں کہا گیا تھا کہ آئی سی سی نے بنگلادیش کی میچز سری لنکا منتقل کرنے کی درخواست مسترد کر دی ہے، تاہم بنگلادیش کرکٹ بورڈ نے ان خبروں کی واضح تردید کر دی ہے۔