بالائی علاقوں میں شدید برفباری،سیاح محصور،2 افراد جاں بحق

 

 ملک کے بالائی علاقوں میں شدید برفباری سے معمولاتِ زندگی بری طرح متاثر ہو گئے ہیں اور مختلف رابطہ سڑکیں بند ہونے کی وجہ سے سیاح اور مقامی آبادی محصور ہو گئی ہیں۔ مختلف حادثات میں 2 افراد کے جاں بحق ہونے کی اطلاعات موصول ہوئی ہیں۔

بلوچستان کے شمالی علاقوں میں برفانی طوفان جاری ہے، زیارت جانے والی درجنوں گاڑیاں کوئٹہ-زیارت شاہراہ پر پھنس گئی ہیں جبکہ چمن کے گردونواح میں 100 سے زائد سیاح گاڑیوں میں محصور ہیں۔ این-50 شاہراہ پر شدید برفباری اور پھسلن کے باعث 9 حادثات پیش آئے جن میں 27 افراد زخمی ہوئے۔ کوژک ٹاپ پر درجہ حرارت منفی 12 ڈگری سینٹی گریڈ تک گر گیا، جس سے سردی کی شدت میں اضافہ ہوا۔

شیلاباغ کے قریب پھسلن کے باعث متعدد گاڑیاں ٹکرا گئیں، حادثے میں 2 افراد جاں بحق اور 7 زخمی ہوئے۔ کوئٹہ میں موسم سرما کی پہلی برفباری بھی ریکارڈ کی گئی، جس سے سردی میں اضافہ اور شہری علاقوں میں مشکلات پیدا ہوئیں۔

خیبرپختونخوا کے اضلاع مانسہرہ، بالائی گلیات، شانگلہ، لوئر دیر، مہمند، کالام، اورکزئی، چترال اور خیبر میں بھی شدید برفباری ہوئی۔ وادی تیراہ میں بارش اور برفباری کے باعث تقریباً 100 گاڑیاں پھنس گئیں جبکہ 35 افراد کو محفوظ مقامات پر منتقل کیا گیا۔ شانگلہ میں بجلی کا نظام متاثر ہوا اور چترال میں متعدد رابطہ سڑکیں بند ہو گئیں۔ ناران میں 6 انچ اور شوگران میں ڈیڑھ انچ برف پڑ چکی ہے، جہاں سیاح بڑی تعداد میں برفباری سے لطف اندوز ہو رہے ہیں۔

گلگت بلتستان کے ضلع استور کے بالائی علاقوں میں 2 سے 3 فٹ تک برفباری سے زمینی رابطے منقطع ہوگئے اور لوگ گھروں میں محصور ہو گئے۔ ہنزہ، نگر اور چیپورسن میں بھی برفباری سے مشکلات میں اضافہ ہوا ہے۔ چلاس، بابوسر ٹاپ، نانگا پربت، بٹوگاہ، داریل اور تانگیر میں برفباری سے سردی کی شدت بڑھ گئی۔

آزاد کشمیر کے مختلف علاقوں میں بارش اور بالائی علاقوں میں وقفے وقفے سے برفباری کا سلسلہ جاری ہے، جبکہ مری میں برفباری کے باعث مری ایکسپریس وے جزوی طور پر بند کر دی گئی ہے۔

وادی تیراہ میں ریسکیو1122 کی ٹیمیں متاثرین کی مدد کے لیے آپریشن جاری رکھے ہوئے ہیں، جہاں اہلکار برف میں پھنسے افراد اور گاڑیوں کو نکالنے میں مصروف ہیں۔ علاقہ سندانہ میں تقریباً 20 گاڑیوں میں سوار 55 افراد کو محفوظ مقامات پر منتقل کر لیا گیا۔

ریسکیو1122 خیبر کے مطابق باڑہ بٹہ تل میں سخی گل نامی مکان کا کمرہ بارش کے باعث گر گیا، جس کے نتیجے میں 5 افراد ملبے تلے دب گئے، جنہیں امدادی ٹیموں نے موقع پر پہنچ کر نکال کر طبی امداد فراہم کی۔