نوجوان تعلیم کی تشکیل میں کلیدی کردار ادا کر رہے ہیں،صدر زرداری

عالمی یومِ تعلیم کے موقع پر صدر مملکت آصف علی زرداری نے کہا ہے کہ نوجوان تعلیم کی مشترکہ تشکیل میں کلیدی کردار ادا کر رہے ہیں اور پاکستان کا مستقبل نوجوانوں سے وابستہ ہے۔

صدر مملکت نے کہا کہ تعلیم صرف معلومات کا حصول نہیں بلکہ تجسس، صلاحیت اور کردار کی تعمیر کا ذریعہ ہونی چاہیے۔ انہوں نے زور دیا کہ آئینِ پاکستان کا آرٹیکل 25 اے مفت اور لازمی تعلیم کے قومی عزم کی عکاسی کرتا ہے۔

آصف علی زرداری نے کہا کہ جدید دنیا کے تقاضوں کے مطابق تعلیم میں ڈیجیٹل خواندگی اور عملی مہارتوں کا فروغ ناگزیر ہو چکا ہے اور تحقیق، جدت اور ڈیجیٹل تعلیم کے بغیر ترقی ممکن نہیں۔

صدر مملکت نے مزید کہا کہ فنی اور پیشہ ورانہ تعلیم نوجوانوں کو باعزت روزگار کے مواقع فراہم کر رہی ہے، جبکہ خواتین اور پسماندہ علاقوں کے نوجوانوں کے لیے مساوی تعلیمی مواقع کی فراہمی وقت کی اہم ضرورت ہے۔ انہوں نے تعلیم کو قومی ترجیح بنانے اور نوجوانوں کو تعلیمی اصلاحات کا شراکت دار بنانے پر زور دیا، کیونکہ تعلیم ہی امن، ترقی اور خوشحالی کی بنیاد ہے۔