سانحہ گل پلازہ،آزاد کمیشن کی تشکیل کیلئے خالد مقبول کا وزیراعظم کو خط

سانحہ گل پلازہ کے بعد چیئرمین ایم کیو ایم پاکستان خالد مقبول صدیقی نے وزیر اعظم شہباز شریف کو خط لکھ کر اعلیٰ سطح کے غیر جانبدار اور شفاف انکوائری کمیشن کی تشکیل کا مطالبہ کیا ہے۔

خط میں کہا گیا ہے کہ کمیشن میں ایف آئی اے، نیب، این ڈی ایم اے اور دیگر متعلقہ ادارے شامل کیے جائیں، جبکہ وفاقی حکومت اور قانون نافذ کرنے والے ادارے فوری طور پر ریسکیو اور ریلیف کے انتظامات سنبھالیں تاکہ انسانی اعضاء اور قیمتی اشیاء محفوظ رہ سکیں۔

خالد مقبول صدیقی نے وفاق کے زیر انتظام ریلیف اور بحالی فنڈ قائم کرنے کا بھی مطالبہ کیا تاکہ متاثرین اور لواحقین کو مالی مدد فراہم کی جا سکے۔ انہوں نے بتایا کہ سات دن گزرنے کے باوجود کئی افراد اب بھی گمشدہ ہیں اور ہزاروں خاندان اس واقعے سے براہِ راست متاثر ہوئے ہیں۔

خط میں کہا گیا ہے کہ سانحے میں ہلاکتوں اور مالی نقصان کے براہِ راست ذمہ دار سندھ حکومت، صوبائی محکمے، بلدیاتی ادارے، میئر کراچی اور ایس بی سی اے ہیں، جنہوں نے مجرمانہ غفلت کا مظاہرہ کیا۔