پی ایس ایل 11 کے لیے کھلاڑیوں کی کیٹیگریز کا اعلان

 

لاہور: پاکستان سپر لیگ (پی ایس ایل) کے 11ویں ایڈیشن کے لیے کھلاڑیوں کی کیٹیگریز کا باقاعدہ اعلان کر دیا گیا ہے۔

پی ایس ایل 11 میں مجموعی طور پر 89 مقامی کھلاڑیوں کو 5 مختلف کیٹیگریز میں تقسیم کیا گیا ہے۔ پلاٹینم کیٹیگری میں 16 کھلاڑی شامل ہیں،

جہاں سلمان آغا، حسن علی، محمد نواز اور ابرار احمد کو ڈائمنڈ سے ترقی دے کر پلاٹینم میں شامل کیا گیا ہے، جبکہ صاحبزادہ فرحان گولڈ سے پلاٹینم کیٹیگری میں پہنچ گئے ہیں۔

بابر اعظم، شاہین شاہ آفریدی، محمد رضوان، فخر زمان، صائم ایوب، نسیم شاہ، حارث رؤف اور شاداب خان اپنی پلاٹینم کیٹیگری برقرار رکھنے میں کامیاب رہے ہیں۔

ڈائمنڈ کیٹیگری میں اس بار 11 کھلاڑی شامل کیے گئے ہیں، جن میں محمد وسیم جونیئر، سفیان مقیم اور سلمان مرزا کو گولڈ سے ترقی دے کر ڈائمنڈ کیٹیگری میں شامل کیا گیا ہے۔

گولڈ کیٹیگری میں 32 کھلاڑی شامل ہوں گے جبکہ سلور اور ایمرجنگ کیٹیگریز میں مجموعی طور پر 30 کھلاڑی شامل کیے گئے ہیں۔

پی ایس ایل کے آئندہ سیزن سے قبل ہر فرنچائز کو پلیئرز آکشن سے پہلے مجموعی طور پر 4 کھلاڑی اور ہر کیٹیگری سے ایک کھلاڑی برقرار رکھنے کی اجازت دی گئی ہے۔

دوسری جانب پاکستان سپر لیگ کے لیے غیر ملکی کھلاڑیوں کی رجسٹریشن کی آخری تاریخ 3 فروری تک بڑھا دی گئی ہے، جبکہ پی ایس ایل کی تاریخ میں پہلی بار پلیئرز آکشن 11 فروری کو منعقد ہوگا۔