اسرائیلی حملے پر ایرانی حکام کا ردعمل سامنے آگیا

ایرانی پارلیمنٹ کی قومی سلامتی کمیٹی کے سربراہ، ابراہیم عزیزی نے کہا ہے کہ ہم نے تمہیں خبردار کیا تھا!۔اسرائیل اور امریکی حملے پرتبصرہ کرتے ہوئے انہوں نے کہا ہے کہ اب تم نے ایک ایسے راستے پر قدم رکھ دیا ہے جس کا انجام اب تمہارے اختیار میں نہیں رہا۔

ایک ایرانی عہدیدار نے خبر رساں ادارے روئٹرز کو بتایا ہے کہ تہران امریکہ اور اسرائیل کے حملوں کا جواب دینے کی تیاری کر رہا ہے، اور یہ جوابی حملے تباہ کن ہوں گے۔

فارس (Fars) نیوز ایجنسی کی رپورٹ کے مطابق اصفہان، قم، کرج اور کرمانشاہ کے شہروں میں دھماکوں کی آوازیں سنی گئی ہیں۔نیوز ایجنسی نے یہ بھی اطلاع دی ہے کہ ایرانی دارالحکومت تہران میں کئی میزائل یونیورسٹی اسٹریٹ اور جمہوریہ کے علاقوں میں گرے ہیں۔
اسلامی جمہوریہ نیوز ایجنسی (IRNA) کی رپورٹ کے مطابق تہران میں دو مقامات پر دھماکوں کی آوازیں سنی گئی ہیں۔ رپورٹ میں مزید کہا گیا ہے کہ شہر کے وسطی علاقے میں دھواں اٹھتا ہوا دیکھا جا سکتا ہے۔