ایران کے وزیرِ تعلیم کا یونیسیف کو خط: اسکولوں پر حملوں کی مذمت اور عالمی کارروائی کا مطالبہ

تہران: ایران کے وزیرِ تعلیم نے یونیسیف (UNICEF) کی ایگزیکٹو ڈائریکٹر کیتھرین رسل کو ایک باضابطہ مراسلہ بھیجا ہے جس میں ایران کے تعلیمی مراکز اور اسکولوں پر حالیہ حملوں پر گہری تشویش کا اظہار کیا گیا ہے۔

وزیرِ تعلیم نے اپنے خط میں امریکی اور اسرائیلی فورسز کی جانب سے تعلیمی ڈھانچے کو نشانہ بنائے جانے کی سخت مذمت کی ہے۔

 رپورٹ کے مطابق ان حملوں میں متعدد طلبہ اور اساتذہ جاں بحق اور زخمی ہوئے ہیں۔ خاص طور پر جنوبی ایران کے علاقے میناب میں ایک پرائمری گرلز اسکول پر ہونے والے حملے کا تذکرہ کیا گیا ہے جس میں بڑے پیمانے پر ہلاکتیں ہوئی ہیں۔

خط میں یونیسیف اور دیگر بین الاقوامی اداروں سے مطالبہ کیا گیا ہے کہ وہ ان “ظالمانہ حملوں” کی فوری مذمت کریں اور تعلیمی اداروں کے تحفظ کو یقینی بنانے کے لیے اپنا کردار ادا کریں۔

 ایرانی حکام کا موقف ہے کہ اسکولوں کو نشانہ بنانا بین الاقوامی انسانی حقوق اور جنیوا کنونشن کی کھلی خلاف ورزی ہے۔