واشنگٹن میں ایران جنگ کے خلاف احتجاج۔60 سے زائد سابق امریکی فوجی گرفتار

امریکہ میں درجنوں سابق فوجیوں اور ان کے اہلِ خانہ کو، جن میں معذور افراد بھی شامل تھے، ایران کے خلاف جنگ کے احتجاج کے دوران گرفتار کر لیا گیا۔

یہ احتجاج واشنگٹن ڈی سی میں واقع کینن ہاؤس آفس بلڈنگ پر کیا گیا، جہاں مظاہرین نے عمارت پر قبضہ کر کے احتجاج ریکارڈ کرایا۔ کم از کم 62 افراد کو حراست میں لیا گیا۔

مظاہرین نے عمارت کے مرکزی ہال میں جمع ہو کر سرخ ٹیولپس اٹھا رکھے تھے تاکہ ایران پر امریکی حملوں میں ہلاک ہونے والوں کو خراجِ عقیدت پیش کیا جا سکے۔ انہوں نے بینرز بھی اٹھا رکھے تھے جن پر لکھا تھا: “ایران کے خلاف جنگ ختم کرو”۔

سوشل میڈیا پر سامنے آنے والی ویڈیوز میں دیکھا گیا کہ مظاہرین نے امریکی فوجی اہلکاروں کی یاد میں پرچم تہ کرنے کی تقریب بھی کی، جس میں اب تک ہلاک ہونے والے 13 اہلکاروں کو خراجِ عقیدت پیش کیا گیا، جبکہ وہ جنگ مخالف نعرے بھی لگا رہے تھے۔

بعد ازاں کیپٹل پولیس نے مظاہرین کو حراست میں لے کر ہاتھوں میں پلاسٹک بندھن ڈالے اور انہیں موقع سے ہٹا دیا۔