ایران میں دواؤں کی قیمتیں آسمان سے باتیں کرنے لگیں

امریکہ اور اسرائیل کے درمیان جنگ کے بعد ایران میں صحت کے شعبے پر سنگین اثرات سامنے آئے ہیں، جس کے نتیجے میں ادویات کی قیمتوں میں نمایاں اضافہ ریکارڈ کیا گیا ہے۔
تنظیم ڈاکٹرز ود آؤٹ بارڈر کے ایران میں مشن کے سربراہ گریگور سِموینیان نے کہا ہے کہ ایران کا صحت کا نظام بنیادی ضروریات کو کافی حد تک پورا کر رہا تھا، لیکن جنگ کی وجہ سے پیدا ہونے والی رکاوٹیں اس سے کہیں زیادہ وسیع ہیں۔
ان کے مطابق سپلائی چین متاثر ہونے سے دباؤ میں اضافہ ہوا ہے اور ادویات کی قیمتوں میں واضح اضافہ دیکھا گیا ہے۔ انہوں نے بتایا کہ گزشتہ ہفتوں میں مریضوں کی تعداد میں اضافہ ہوا ہے، خاص طور پر جنگ بندی کے اعلان کے بعد صورتحال مزید غیر یقینی ہو گئی ہے۔
ایرانی حکام کے مطابق بعض ادویات کی قیمتیں دو گنا ہو گئی ہیں جبکہ کچھ ادویات میں 1000 فیصد تک اضافہ ریکارڈ کیا گیا ہے، جس کی بڑی وجہ ضروری خام مال اور اجزاء کی قلت ہے۔
حکام کا کہنا ہے کہ یہ قلت طویل عرصے سے جاری امریکی پابندیوں اور امریکی-اسرائیلی حملوں کے اثرات کے باعث ہے، جنہوں نے ایران کی بڑی دوا ساز کمپنیوں کو بھی متاثر کیا ہے۔ اس کے ساتھ ساتھ امریکی پابندیوں اور بندرگاہوں کی بندش نے صورتحال کو مزید خراب کر دیا ہے۔
حکام کے مطابق مجموعی طور پر تقریباً 20 فیصد ادویات کی قیمتوں میں تبدیلی دیکھی گئی ہے۔