جامعہ کراچی میں امتحانی بائیکاٹ چوتھے ہفتے میں داخل۔50 ہزار طلبہ متاثر

ملک کی سب سے بڑی یونیورسٹی میں تقریباً 50 ہزار طلبہ غیر یقینی صورتحال کا شکار ہیں کیونکہ اساتذہ کی جانب سے سمسٹر امتحانات کا بائیکاٹ چوتھے ہفتے میں داخل ہو گیا ہے۔ یہ بائیکاٹ مبینہ طور پر واجبات کی عدم ادائیگی کے باعث کیا گیا ہے، جس سے تعلیمی منصوبے متاثر ہوئے ہیں اور طلبہ و والدین میں بڑھتی ہوئی بے چینی پائی جا رہی ہے۔

امتحانات کی بحالی کے لیے کسی واضح ٹائم لائن کے نہ ہونے کے باعث طلبہ کو خدشہ ہے کہ تعلیمی کیلنڈر مزید متاثر ہوگا، سمسٹر مختصر ہو جائیں گے اور ان کی چھٹیاں بھی ضائع ہو سکتی ہیں۔

طلبہ اور اساتذہ کے درمیان جاری تنازع کے حل کے لیے صوبائی حکومت، خصوصاً وزیراعلیٰ سندھ کی جانب سے عدم توجہ پر بھی تنقید کی جا رہی ہے، جو سندھ کی تمام سرکاری جامعات کے کنٹرولنگ اتھارٹی ہیں۔

جامعہ کراچی کے اساتذہ 5 مئی سے شام کی کلاسز، کاپی چیکنگ، امتحانی نگرانی، پرچہ سازی، نگرانی، ہاؤس سیلنگ اور لیو انکیشمنٹ سمیت مختلف واجبات کی عدم ادائیگی پر امتحانات کا بائیکاٹ کر رہے ہیں۔ اساتذہ نے جامعہ میں مالی بحران کی تحقیقات کا مطالبہ کرتے ہوئے کہا ہے کہ مطالبات پورے ہونے تک ہڑتال ختم نہیں کی جائے گی۔

تاہم اس طویل بائیکاٹ نے طلبہ پر شدید ذہنی دباؤ اور مایوسی بڑھا دی ہے۔

ایک طالب علم نے بتایا کہ میں اب مزید جامعہ کراچی میں پڑھنا نہیں چاہتا، میں اس بوسیدہ نظام سے تنگ آ چکا ہوں۔ میں نے وقت پر فیس ادا کی لیکن مجھے سہولیات نہیں ملیں۔

بین الاقوامی تعلقات کے شعبے کی پہلی سال کی طالبہ نے کہا کہ یہ ان کا پہلا سمسٹر ہے اور وہ ابھی یونیورسٹی کے نظام کو سمجھنے کی کوشش کر رہی ہیں، لیکن امتحانات اچانک منسوخ کر دیے گئے۔

انگریزی شعبے کے ایک طالب علم نے کہا کہ امتحانات میں تاخیر اور واضح رابطے کی کمی نے تعلیمی شیڈول کو شدید متاثر کیا ہے اور اگلے سمسٹر پر بھی اثر پڑنے کا خدشہ ہے۔

ویژول اسٹڈیز کے آخری سال کے ایک طالب علم نے کہا کہ وہ اساتذہ کے مطالبات کی حمایت کرتے ہیں، مگر اس طرح کے تنازعات یونیورسٹی میں بار بار پیدا ہوتے رہتے ہیں اور اس کا سب سے زیادہ نقصان طلبہ کو ہوتا ہے۔

انہوں نے کہا کہ ایک ماہ سے زیادہ وقت ضائع ہو چکا ہے لیکن یونیورسٹی نے اس تاخیر کو پورا کرنے کا کوئی واضح منصوبہ نہیں دیا۔

طلبہ نے یہ بھی کہا کہ فیسیں بڑھتی جا رہی ہیں لیکن تعلیمی معیار اور سہولیات میں کوئی بہتری نہیں آئی۔

جامعہ کراچی اساتذہ سوسائٹی کے صدر سید غفران عالم نے کہا کہ ایسے تنازعات میں سب سے زیادہ نقصان طلبہ کو ہوتا ہے، تاہم اس کی ذمہ داری “ناقص انتظامیہ” پر عائد ہوتی ہے۔

انہوں نے کہا کہ انتظامیہ طلبہ کو تعلیمی سہولیات اور ملازمین کو بروقت تنخواہیں دینے میں ناکام رہی ہے۔