ڈانس پارٹی کی ویڈیو وائرل ہونے پر اسلام آباد میں معروف شیشہ کیفے سیل

اسلام آباد: وفاقی دارالحکومت کے پوش علاقے الیون الیٹ (F-6) میں واقع ایک معروف شیشہ کیفے “لا بالٹو” (La Balto) کو سوشل میڈیا پر ڈانس پارٹی کی ویڈیوز وائرل ہونے کے بعد سیل کر دیا گیا ہے۔

انتظامیہ نے قانون کی خلاف ورزی پر کیفے کے مالک اور ایونٹ آرگنائزر کے خلاف سخت قانونی کارروائی کا آغاز کر دیا ہے۔

سوشل میڈیا پر ڈانس پارٹی کی ویڈیوز وائرل ہونے کے بعد ڈپٹی کمشنر اسلام آباد نے ایف-6 میں واقع شیشہ کیفے لا بالٹو کے خلاف کارروائی کرتے ہوئے کیفے کو سیل کر دیا۔ انتظامیہ نے کیفے کے مالک شجاعت افضل اور ایونٹ آرگنائزر فیصل مطلوب کے خلاف ایف آئی آر بھی درج کر لی۔@dcislamabad pic.twitter.com/aU1AozZjVb

— Rana Ashraf (@AshrafRana02) June 8, 2026

تفصیلات کے مطابق، گزشتہ چند روز سے سوشل میڈیا پر ایک ویڈیو تیزی سے گردش کر رہی تھی، جس میں ایف-6 میں واقع کیفے “لا بالٹو” میں منعقدہ ایک ڈانس پارٹی کے مناظر دکھائے گئے تھے۔ ویڈیو وائرل ہونے پر عوامی حلقوں کی جانب سے شدید ردعمل سامنے آیا اور انتظامیہ سے کارروائی کا مطالبہ کیا گیا۔

عوامی شکایات اور سوشل میڈیا پر موجود شواہد کا نوٹس لیتے ہوئے ڈپٹی کمشنر اسلام آباد نے فوری کارروائی کے احکامات جاری کیے۔ ضلعی انتظامیہ اور پولیس کی ٹیم نے مذکورہ کیفے پر چھاپہ مار کر اسے موقع پر ہی سیل کر دیا۔

انتظامیہ نے نہ صرف کیفے کو سیل کیا بلکہ غیر قانونی سرگرمیوں اور ضابطہ اخلاق کی خلاف ورزی پر سخت قانونی دفعات کے تحت مقدمہ بھی درج کر لیا ہے۔

پولیس نے کیفے کے مالک شجاعت افضل اور ایونٹ کے آرگنائزر فیصل مطلوب کے خلاف ایف آئی آر درج کر لی ہے۔

 پولیس حکام کا کہنا ہے کہ ملزمان کی گرفتاری کے لیے چھاپے مارے جا رہے ہیں اور قانون ہاتھ میں لینے والوں کے ساتھ کوئی نرمی نہیں برتی جائے گی۔