ملکی استحکام اورمعاشی ترقی کے لیے سیاسی اتفاقِ رائے ضروری ہے،وزیراعظم

اسلام آباد: وزیراعظم شہباز شریف نے کہا ہے کہ پاکستان کی ترقی، استحکام اور خوشحالی کے لیے تمام سیاسی قوتوں کو اختلافات سے بالاتر ہو کر مشترکہ طور پر کام کرنا ہوگا۔

قومی اسمبلی کے بجٹ اجلاس سے خطاب کرتے ہوئے وزیراعظم نے کہا کہ ملک کی مضبوطی ہم سب کی مشترکہ ذمہ داری ہے اور پاکستان کے مفاد کے لیے دی جانے والی ہر قربانی قابل قدر ہے۔ انہوں نے اس بات پر زور دیا کہ قومی معاملات میں تعاون اور ہم آہنگی وقت کی اہم ضرورت ہے۔

وزیراعظم نے اپوزیشن جماعتوں کو ایک بار پھر مذاکرات کی دعوت دیتے ہوئے کہا کہ قومی معیشت اور جمہوری استحکام کے لیے وسیع تر اتفاقِ رائے پیدا کیا جانا چاہیے۔ ان کا کہنا تھا کہ مکالمے کے دروازے کھلے ہیں اور تمام سیاسی قوتوں کو ملک کے بہتر مستقبل کے لیے ایک میز پر بیٹھنا چاہیے۔

شہباز شریف نے کہا کہ صوبوں کو وسائل کی منصفانہ تقسیم ان کا آئینی حق ہے اور وفاق تمام اکائیوں کی یکساں ترقی کے لیے اقدامات جاری رکھے ہوئے ہے۔ انہوں نے بلوچستان کی ترقی کے لیے مختلف منصوبوں اور مالی وسائل میں اضافے کا بھی ذکر کیا۔

وزیراعظم نے دہشت گردی کے خلاف قربانیاں دینے والے سیکیورٹی فورسز کے افسران اور جوانوں کو خراج عقیدت پیش کرتے ہوئے کہا کہ ملک میں امن و استحکام کے لیے شہدا کی خدمات ہمیشہ یاد رکھی جائیں گی۔ انہوں نے اس عزم کا اظہار کیا کہ دہشت گردی کے خاتمے اور قومی سلامتی کے لیے کوششیں جاری رکھی جائیں گی۔