بچوں کا نفقہ نہ دینے والے 13 ہزار افراد پر ورلڈ کپ اسٹیڈیمز کے دروازے بند

ارجنٹائن نے بچوں کا نفقہ ادا نہ کرنے والے افراد کے خلاف منفرد اقدام کرتے ہوئے ایسے ہزاروں افراد کو قومی فٹبال ٹیم کے ورلڈ کپ میچز دیکھنے سے روکنے کا فیصلہ کیا ہے۔

حکام کے مطابق حکومت نے امریکہ کے متعلقہ اداروں کو تقریباً 35 ہزار افراد کی فہرست فراہم کی ہے، جن میں 13 ہزار ایسے افراد شامل ہیں جو اپنے بچوں کے اخراجات ادا نہیں کرتے۔ ان افراد کو ارجنٹائن کے ورلڈ کپ میچز کے دوران اسٹیڈیم میں داخلے کی اجازت نہیں دی جائے گی۔

ارجنٹائن کی قومی سلامتی کی وزیر نے بتایا کہ یہ معلومات امریکی محکمہ داخلہ، ایف بی آئی اور دیگر سیکیورٹی اداروں کے ساتھ شیئر کی گئی ہیں تاکہ سیکیورٹی انتظامات کو مزید مؤثر بنایا جا سکے۔

انہوں نے واضح کیا کہ جو افراد اپنی قانونی اور خاندانی ذمہ داریاں پوری نہیں کرتے، انہیں عوامی تقریبات میں خصوصی رعایت نہیں دی جا سکتی۔ ان کا کہنا تھا کہ بچوں کے حقوق کا تحفظ حکومت کی اولین ترجیح ہے۔

یہ فہرست “ٹریبونا سیگورا” نامی قومی ڈیٹا بیس سے تیار کی گئی، جسے اسٹیڈیمز میں داخل ہونے والے افراد کی شناخت اور مطلوب یا پابندی کا سامنا کرنے والے افراد کی نشاندہی کے لیے استعمال کیا جاتا ہے۔

حکام کے مطابق اس نظام نے گزشتہ چند برسوں کے دوران ایک ہزار سے زائد ایسے افراد کی شناخت میں مدد دی جن کے خلاف گرفتاری کے وارنٹ جاری تھے۔ سیکیورٹی ماہرین کا کہنا ہے کہ بڑے کھیلوں کے مقابلے قانون نافذ کرنے والے اداروں کے لیے مطلوب افراد تک پہنچنے کا مؤثر ذریعہ ثابت ہو سکتے ہیں، بشرطیکہ تمام اقدامات قانونی تقاضوں کے مطابق کیے جائیں۔