فرانس نے پیراگوئے کو ہرا کر کوارٹر فائنل کیلئے کوالیفائی کرلیا

فیفا ورلڈ کپ 2026 کے پری کوارٹر فائنل میں فرانس نے سنسنی خیز مقابلے کے بعد پیراگوئے کو ایک صفر سے شکست دے کر کوارٹر فائنل میں رسائی حاصل کر لی، جہاں اس کا سامنا مراکش سے ہوگا۔

امریکہ کے شہر فلاڈیلفیا میں کھیلے گئے میچ میں پیراگوئے نے مضبوط دفاعی کھیل پیش کیا اور فرانسیسی حملوں کو طویل عرصے تک ناکام بنائے رکھا۔ تاہم 70ویں منٹ میں وی اے آر کے جائزے کے بعد فرانس کو پنالٹی ملی، جب متبادل کھلاڑی ڈیزائرے دوئے کو پنالٹی ایریا میں فاؤل کیا گیا۔

کپتان کیلیان ایمباپے نے پنالٹی پر گول کر کے فرانس کو برتری دلائی، جو میچ کا واحد اور فیصلہ کن گول ثابت ہوا۔ اس گول کے ساتھ ایمباپے نے ورلڈ کپ 2026 میں اپنے گولز کی تعداد سات کر لی اور گولڈن بوٹ کی دوڑ میں لیونل میسی کی برابری کر لی، جبکہ یہ ان کے ورلڈ کپ کیریئر کا 19واں گول بھی تھا۔

میچ کے اختتامی لمحات میں پیراگوئے نے برابری کے لیے کئی خطرناک حملے کیے، لیکن فرانسیسی گول کیپر مائیک مینیان کی شاندار گول کیپنگ اور دفاع کی مضبوط کارکردگی نے فرانس کی برتری برقرار رکھی۔

اس کامیابی کے بعد فرانس نے کوارٹر فائنل میں جگہ بنا لی، جہاں اس کا مقابلہ مراکش سے ہوگا۔ دونوں ٹیموں کے درمیان یہ میچ خاص اہمیت کا حامل ہوگا کیونکہ 2022 کے ورلڈ کپ سیمی فائنل میں بھی فرانس نے مراکش کو شکست دے کر فائنل تک رسائی حاصل کی تھی۔