آزاد کشمیر کے 45 حلقوں میں 852 امیدوار میدان میں، حتمی فہرست جاری

الیکشن کمیشن آزاد جموں و کشمیر نے قانون ساز اسمبلی کے عام انتخابات 2026 کے لیے امیدواروں کی حتمی فہرست جاری کر دی ہے۔ فہرست کے مطابق 45 انتخابی حلقوں میں مجموعی طور پر 852 امیدوار میدان میں ہیں، جبکہ 320 سے زائد امیدوار اپنے کاغذاتِ نامزدگی واپس لے چکے ہیں۔

جاری کردہ اعداد و شمار کے مطابق میرپور، بھمبر، کوٹلی، باغ، حویلی، پونچھ، سدھنوتی، نیلم، مظفرآباد اور جہلم ویلی کے مختلف حلقوں میں امیدوار انتخابی مقابلے میں حصہ لیں گے۔ اس کے علاوہ مہاجرین جموں و کشمیر کی 12 مخصوص نشستوں پر بھی 126 امیدوار مدِمقابل ہیں۔

الیکشن کمیشن کے مطابق 24 رجسٹرڈ سیاسی جماعتوں کو ان کے انتخابی نشانات الاٹ کر دیے گئے ہیں، جبکہ آزاد امیدواروں کو بھی جلد انتخابی نشانات جاری کیے جائیں گے۔

حکام کا کہنا ہے کہ حتمی امیدواروں کی فہرست جاری ہونے کے بعد انتخابی مہم میں مزید تیزی آنے کا امکان ہے، اور مختلف سیاسی جماعتیں اپنے امیدواروں کی کامیابی کے لیے بھرپور انتخابی سرگرمیاں شروع کریں گی۔