مشرقِ وسطیٰ کشیدگی،عالمی منڈی میں سونے کی قیمت دو ہفتوں کی بلند ترین سطح پر پہنچ گئی

مشرقِ وسطیٰ میں بڑھتی ہوئی کشیدگی اور عالمی معاشی خدشات کے باعث عالمی منڈی میں سونے کی قیمت دو ہفتوں کی بلند ترین سطح پر پہنچ گئی، جبکہ سرمایہ کار محفوظ سرمایہ کاری کے طور پر سونے کی جانب متوجہ دکھائی دیے۔

بین الاقوامی مارکیٹ میں اسپاٹ گولڈ کی قیمت تقریباً 1.3 فیصد اضافے کے بعد 4,129.43 ڈالر فی اونس تک پہنچ گئی، جبکہ امریکی گولڈ فیوچر بھی 1.4 فیصد اضافے کے ساتھ 4,134.50 ڈالر فی اونس ریکارڈ کیا گیا۔

معاشی ماہرین کے مطابق حالیہ دنوں میں قیمتوں میں کمی کے بعد سرمایہ کاروں نے دوبارہ سونے کی خریداری شروع کی، جبکہ مشرقِ وسطیٰ میں جاری کشیدگی اور عالمی غیر یقینی صورتحال نے بھی قیمتوں کو سہارا دیا۔

تجزیہ کاروں کا کہنا ہے کہ تیل کی قیمتوں میں اضافے سے مہنگائی کے خدشات میں اضافہ ہوا ہے، جبکہ امریکی فیڈرل ریزرو کی آئندہ شرحِ سود سے متعلق پالیسی پر بھی سرمایہ کاروں کی گہری نظر ہے۔

دوسری جانب خطے میں بڑھتی ہوئی کشیدگی اور توانائی کی سپلائی سے متعلق خدشات نے عالمی مالیاتی منڈیوں میں غیر یقینی صورتحال کو مزید بڑھا دیا ہے۔

ادھر دیگر قیمتی دھاتوں کی قیمتوں میں بھی اضافہ ریکارڈ کیا گیا، جہاں چاندی، پلاٹینم اور پیلیڈیم کی قیمتیں بھی گزشتہ روز کے مقابلے میں بلند سطح پر رہیں۔